रिबन

दुई महिनायता ओलीले कांग्रेसविरुद्ध एक शब्द पनि नबोल्नु ‘अर्थपूर्ण’

काठमाडौं । प्रधानमन्त्री केपी ओली यतिसम्म असहिष्णु र अराजक भएर प्रस्तुत हुन थालेका छन् कि सार्वजनिक कार्यक्रममा के बोल्ने के नबोल्ने भन्ने सबै होस गुमाउन थालेका छन् ।

आफ्ना प्रतिस्पर्धी नेताहरूलाई त उनले हरेक दिनजसो गालीगलौज र आरोप लगाइरहेका छन् । राज्यका दोस्रो र पाँचौं वरीयताका नेतालाई समेत उनले छाडेका छैनन् । शनिबार उनले विराटनगरमा उपराष्ट्रपति नन्दबहादुर पुन र सभामुख अग्निप्रसाद सापकोटाविरुद्ध बोले । जबकि वरीयतामा उपराष्ट्रपति पुन प्रधानमन्त्रीभन्दा माथि छन् । आफूले गरेको निर्णयविरुद्ध आलोचना गर्ने जोसुकै पनि अहिले ओलीको निसानामा पर्ने गरेका छन् ।

त्यति मात्र होइन, ओलीले निर्वाचन आयोग र सर्वोच्च अदालतलाई समेत धम्की र चेतावनी दिन थालेका छन् । प्रधानमन्त्रीकै कुर्सीमा बसेर स्वतन्त्र न्यायपालिका र संवैधानिक निकाय निर्वाचन आयोगलाई धम्की र चेतावनी दिनुले हामीले कस्तो प्रधानमन्त्रीलाई रोज्यौं भनेर समीक्षा गर्ने बेला आएको छ ।

बहालवाला प्रधानमन्त्री नै अदालतको निर्णय मान्दिनँ, आन्दोलनमा जान्छु भनेर भन्छ भने उसले देशलाई संविधान र कानुनअनुसार चलाउँछ भनेर कसरी विश्वास गर्ने ?

प्रधानमन्त्री ओलीले पुष्पकमल दाहाल प्रचण्ड, माधवकुमार नेपाल, झलनाथ खनाल, घनश्याम भुसाल, योगेश भट्टराई, रामकुमारी झाँक्री कसैलाई पनि आमसभामा उडाउन छाडेका छैनन् । जबकि सबैजना नेकपाकै नेताहरू हुन् । हिजो ओलीलाई प्रधानमन्त्री बनाउन ती सबैले काँध थापेकै हुन् ।

यतिवेला सबैभन्दा रहस्यमय चाहिँ प्रधानमन्त्री ओलीले कांग्रेसविरुद्ध एक शब्द पनि उच्चारण नगर्नुलाई मानिएको छ । जबकि ओलीको कदमविरुद्ध कांग्रेस आन्दोलनमै छ । कांग्रेसका नेताहरूले दिनहुँ ओलीविरुद्ध कडा आलोचना गरिरहेका छन् । तर, पनि ओली एक शब्द पनि कांग्रेस र सो पार्टीका नेताविरुद्ध बोल्दैनन् ।

निर्वाचनका बेला र प्रधानमन्त्री बनेपछि ओलीले कुनै दिन पनि कांग्रेस र सो पार्टीका नेताहरूलाई गाली नगरेको भन्ने थिएन । जब पार्टीभित्रैबाट उनी असुरक्षित बन्न थाले र प्रतिनिधिसभा विघटन गर्न पुगे तब ओलीको बोली कांग्रेसविरुद्ध बन्द भएको छ ।

ओलीको कांग्रेसविरुद्धको मौनतालाई राजनीतिक विश्लेषकहरूले लामो समयसम्म राजनीतिक सहकार्यका रूपमा बुझेका छन् । कांग्रेस सभापति शेरबहादुर देउवा र प्रधानमन्त्री ओलीबीच एक किसिमको अन्डरस्ट्यान्डिङ भएको हुनसक्ने आशंका गर्न थालिएको छ । प्रतिनिधिसभा पुनःस्थापनाको विषयमा कांग्रेसले सशक्त आन्दोलन गर्न नचाहनुको अर्थ पनि त्यही हुन सक्ने बुझाइ छ ।

 प्रतिक्रिया

तपाईको इ-मेल ठेगाना प्रकाशित हुँदैन। आवश्यक क्षेत्रहरू चिनो लगाइएका छन् *