कर्णाली प्रदेश

भूकम्प प्रभावितको अस्थायी आवासका लागि थप ९० करोड निकासा

काठमाडौ‌।जाजरकोट भूकम्पबाट प्रभावितका लागि अस्थायी आवास निर्माणले तीव्रता पाएसँगै सरकारले अनुदान रकम वितरणलाई प्राथमिकताका साथ अघि बढाएको छ ।

राष्ट्रिय विपद् जोखिम न्यूनीकरण तथा व्यवस्थापन प्राधिकरणका अनुसार अनुदानको दोस्रो किस्ता उपलब्ध गराउन थप ९० करोड रुपैयाँ निकासा भएको छ ।

यसमध्ये ५० करोड जाजरकोट र ४० करोड रुपैयाँ रुकुम पश्चिमका जिल्ला विपद् व्यवस्थापन कोषमा पठाइसकिएको प्राधिकरणका प्रवक्ता गोमादेवी चेम्जोङले जानकारी दिइन्।

आजसम्म अस्थायी आवास निर्माण गर्न कूल रु तीन अर्ब १६ करोड निकासा भएको प्राधिकरणले जनाएको छ। हालसम्म पहिचान भएका लाभग्राहीको सङ्ख्या ८२ हजार ९३७ पुगेको छ। अस्थायी आवास निर्माणमा पनि उल्लेख्य वृद्धि भएको जनाइएको छ।

अहिलेसम्म ४८ हजार ५६५ आवास बनिसकेका छन् भने निर्माण भइरहेका अस्थायी आवासको सङ्ख्या सात हजार ८३३ रहेको प्राधिकरणले जनाएको छ ।

गत कात्तिक १७ गते जाजरकोटको रामीडाँडा केन्द्रविन्दु भएर ६.४ रेक्टर स्केलको भुकम्प गएको थियो। भूकम्पमा क्षति भएका घरहरूको अहिले अस्थायी आवास निर्माण जारी छ। पुनः निर्माणका लागि आवश्यक तयारी भइरहेको गृह मन्त्रालयले जनाएको छ।

 प्रतिक्रिया

तपाईको इ-मेल ठेगाना प्रकाशित हुँदैन। आवश्यक क्षेत्रहरू चिनो लगाइएका छन् *

ताजा अपडेट