काठमाडौँ । टी-२० विश्वकप छनौट अन्तर्गत ओमान र हङकङले आ-आफ्ना खेल जितेका छन् ।
आजदेखि शुरु भएको टी- २० विश्वकपको एशिया कप छनौट अन्तर्गत आजका खेलमा ओमानले मलेसियालाई ३२ रनले पराजित गरेको छ भने हङकङले कुवेतमाथि १६ रनको जित हासिल गरेको छ ।
समुह ए मा रहेको ओमानले दिएको १५४ रनको लक्ष्य पछाएको मलेसिया २० ओभरमा ६ विकेट गुमाएर १२१ रन मात्र बनाएपछि ओमान ३२ रनले विजयी भएको हो ।
योसँगै समुह ए मा नेपाल र ओमानले आ-आफ्नो पहिलो खेल जितेर २-२ अंक हासिल गरेका छन् । नेपाल राम्रो रनरेटका साथ शिर्ष स्थानमा रहेको छ भने ओमान दोस्रो स्थानमा रहेको छ । त्यस्तै समुह ए मा रहेका सिंगापुर र मलेसियाले आ-आफ्नो पहिलो खेल हारेका छन् । अब समुह मा मंगलबार नेपालले मलेसियाको र ओमानले सिंगापुरको सामना गर्दै छन् ।
त्यसैगरी समुह बी मा रहेको हङकङले दिएको १६७ रनको लक्ष्य पछाएको कुवेत २० ओभरमा ८ विकेट गुमाउदै १५० रन बनाएपछि हङकङ १६ रनले विजयी भएको हो । यो जितसँगै हङकङले समुह बी मा महत्वपूर्ण २ अंक हासिल गरेको छ ।
त्यस्तै आजै सम्पन्न खेलमा समुह मै रहेको युएईले बहराइनलाई पराजित गरेको थियो । समुह बि मा हङकङ र युएईले जितसँगै २-२ अंक हासिल गरेका छन् भने बहराइन र कुवेतले आ-आफ्नो पहिलो खेल हारेका छन् । अब मंगलबार बहराइन र हङकङ तथा युएई र कुवेत खेल्दै छन् ।
