काठमाडौं । सहकारी ठगी प्रकरणमा प्रक्राउ परेका पूर्व गृहमन्त्री तथा राष्ट्रिय स्वतन्त्र पार्टीका सभापति रवि लामिछानेको थप बलियो नयाँ प्रमाण हस्ताक्षर गरेको चेक फेला परेको छ । सुर्यदर्शन सहकारी र बुटवलको सुप्रिम सहकारीको अनुसन्धान गर्नेक्रममा ती दुबै सहकारीलाई लामिछानेको हस्ताक्षर रहेको चेक बुझाएको र त्यसको प्रतिलिपी फेला परेको कास्की प्रहरीले जनाएको छ । आफुले सहकारीको रकम हिनामिना नगरेको भन्दै अपराधबाट मुक्त हुन खोजी रहेका लामिछानेलाई उक्त चेक फेला परेपछि जवाफ दिन निकै गाह्रो भएको प्रहरीको भनाइ छ ।
कास्की प्रहरीमा बयान दिने क्रममा उक्त हस्ताक्षरसहितको चेकका बारेमा बयान लिदाँ उनले आफूले त्यस्तो नगरेको तर दराजमा राखेको समयमा अरु कसैले हस्ताक्षर गरेर बुझाइदिएको हुनसक्ने बकम्फुसे कुरा गरेका छन् । अहिले नागरिकहरुले लामिछानेको कालो कर्तुत फेला परिसकेकाले उक्त अपराधबाट मुक्त हुन चिप्लो जवाफ दिइरहेको बताएका छन् ।
चेकको प्रतिलिपी देखाएपछि आतिएका लामिछानेले अहिले चेक आफूले नकाटेको दाबी गरे तर प्रहरीले लामिछानले अपराधबाट मुक्त हुन त्यस्तो कुुरा गरेको बताए । हस्ताक्षर चेक परिक्षणमा अहिलेसम्मको सबैभन्दा बलियो प्रमाण बनेको कास्की प्रहरीले जनाएको छ । जिल्ला प्रहरी कार्यालय कास्कीको हिरासतमा रहेका लामिछानेलाई थप १५ दिन हिरासतमा राख्न कास्की जिल्ला अदालतले अनुमति दिएको छ।
अदालतले अनुसन्धानका लागि हिरासतमा राख्न दिएको म्याद सकिएपछि आइतबार उनलाई अदालतमा पेस गरिएको थियो। न्यायाधीश भीमलाल बेलबासेले इजलासले उनलाई अनुसन्धानका लागि थप १५ दिन हिरासतमा राख्न प्रहरीलाई अनुमति दिएको हो । यस अगाडि अदालतले कात्तिक २५ मा प्रहरीलाई १३ दिनको म्याद दिएको थियो। सो म्याद आइतबार सकिएपछि प्रहरीले अनुसन्धान बाँकी नै रहेको भन्दै थप म्याद मागेको थियो। लामिछाने पोखराको सुर्यदर्शन सहकारीमा रहेको बचतकर्ताहरूको रकम दुरुपयोग गरेको आरोपमा कात्तिक दुई गते काठमाडौँमा पक्राउ परेका थिए। लामिछाने हिरासतमा रहेको एक महिना एकहप्ता भएको छ ।
लामिछानेमाथि सुर्यदर्शनसहित बुटवलको सुप्रिम, चितवनको सहारा र काठमाडौँको स्वर्णलक्ष्मी सहकारी ,वीरगञ्जको सानो पाइला बचत तथा ऋण सहकारी संस्था र नेपालगञ्जको समानता सहकारी (कुमार रम्तेल सचिव रहेको) बाट २२ करोड ४६ लाख ३० हजार रुपैयाँ गोर्खा मिडिया नेटवर्कमा गएको अनुसन्धान प्रतिवेदनमा उल्लेख गरिएको छ ।
विभिन्न सहकारीमा बचत भएको रकम दुरुपयोग गरेको आरोपमा लामिछानेमाथि अहिले प्रहरीले अनुसन्धान जारी छ । बुटवल लगेर सुप्रिम सहकारीको रकम दुरुपयोगबारे उनको बयान भइसकेको छ। बुटवलको बयान सकिएपछि पुन पोखरा फर्काइएका उनी विरुद्ध चितवन र काठमाडौँमा समेत पक्राउ पुर्जी जारी भइसकेको छ। यस्तै सुप्रिम सहकारीबाट विभिन्न व्यक्तिको नाममा ६४ करोड २९ लाख रुपैयाँ ऋण प्रवाह भएको छ । त्यसमध्ये रवि लामिछानेको नाममा २ करोड ऋण प्रवाह भएको थियो, जसलाई लामिछानेले अस्वीकार गर्दै आएका थिए ।
सुप्रिमबाट गोर्खा मिडिया प्रा।लि।मा करिब साढे ६ करोड रुपैयाँ ऋण प्रवाह भएको संसदीय छानबिन समिति र उपत्यका अपराध अनुसन्धान महाशाखा ब्युरो सिआईबीले निष्कर्ष निकालेपछि सोही आधारमा लामिछानेमाथि अनुसन्धान छानबिन प्रक्रिया अघि बढेको हो ।
