काठमाडौं । स्वास्थ्य तथा जनसंख्या मन्त्रालयले स्वास्थ्य संस्थाहरूमा कार्यरत सबै नर्सिङ एवं स्वास्थ्यकर्मीहरूको न्युनतम पारिश्रमिक सरकारी सरह लागू गर्न निर्देशन दिएको छ ।
मन्त्रालयको सचिवस्तरीय निर्णय अनुसार देशभरका प्रतिष्ठान सरकारी अस्पताल, मेडिकल कलेज र सामुदायिक निजी अस्पताललाई पत्र लेख्दै स्वास्थ्यकर्मीको सेवा सुविधा व्यवस्था गर्न मन्त्रालयले निर्देशन दिएको हो । अहिले सरकारी अस्पतालहरुमा सोही काम गनेृ नर्सहको अनुहारमा खुशी र निजी अस्पतालमा काम गर्ने नर्सहरुको आँखामा आँसु भएको गुनासो सर्वत सार्वजनिक भएपछि स्वास्थ्यमन्त्री प्रदिप पौडेलले सबै निजी अस्पतालमा पनि सरकारी अस्पतालमा सरह सेवा सुविधा लागू गर्ने विषयमा चासो राखेका हुन् ।
मन्त्रालयले जारी गरेको सुचनामा तोकिएको समय भन्दाबढी कार्यको लागि अतिरिक्त भत्ताको व्यवस्था गर्नुपर्ने उल्लेख गरिएको छ। स्वास्थ्य तथा शैक्षिक संस्थाले करार नियुक्ति सम्झौता गरी राख्नुपर्ने, ज्यालादारीमा कार्य गराउन नपाईने, सक्कल शैक्षिक लब्धांक पत्रहरू कार्यालयले राख्न नपाइने पनि निर्णयमा उल्लेख गरिएको छ । स्वास्थ्यकर्मीलाई अनुभवको पत्र प्रदान गर्नुपर्ने समेत जारी निर्देशन पत्रमा उल्लेख छ । नर्सिङ लगायतका अन्य स्वास्थ्यकर्मीहरूको पारिश्रमिक बैकिङ प्रणालीबाट मात्र उपलब्ध गराउन समेत मन्त्रालयले निर्देशन दिएको छ ।
