काठमाडौँ। वन तथा वातावरणमन्त्री ऐनबहादुर शाही ठकुरीले राष्ट्रिय बाह्य मिचाहा प्रजाति व्यवस्थापन रणनीति तथा कार्यान्वयन योजना, २०८१ स्वीकृत गरेका छन् ।
वन अनुसन्धान तथा प्रशिक्षण केन्द्रले तयार पारेको यो योजना १५ वर्षदेखि स्वीकृतिको पर्खाइमा थियो। अर्थ मन्त्रालय, कृषि तथा पशुपन्छी विकास मन्त्रालय र अन्य सरोकारवाला निकायको सुझाव समेटेर तयार पारिएको यो रणनीति मन्त्रिस्तरीय निर्णयबाट स्वीकृत भएको हो।
वन अनुसन्धान तथा प्रशिक्षण केन्द्रका महानिर्देशक डा. राजेन्द्र केसीले यो रणनीति स्वीकृत हुनु मिचाहा प्रजातिको समस्या समाधानमा महत्वपूर्ण कदम भएको बताए। यसले मिचाहा प्रजातिको नियन्त्रण र फैलावट रोक्न सहयोग पुग्ने विश्वास व्यक्त गरे।
मिचाहा प्रजातिहरूले जैविक विविधता, पारिस्थितिकीय प्रणाली र कृषि उत्पादनमा गम्भीर असर पुर्याउने गरेका छन्। यो रणनीतिले ती असरहरूलाई कम गर्न र दिगो वन व्यवस्थापनमा योगदान पुर्याउने अपेक्षा गरिएको छ।
