काठमाडौं । नेपाली कांग्रेसले तल्ला तहका समितिलाई क्रियाशील सदस्यता नवीकरण तोकिएको समयमा गर्न परिपत्र गरेको छ । महामन्त्री गगनकुमार थापाको संयोजकत्वमा रहेको सदस्यता व्यवस्थापन केन्द्रीय समितिले वडा, प्रदेश सभा क्षेत्र, क्षेत्रीय समितिलाई क्रियाशील सदस्यता नवीकरणका लागि समय तोकेर निर्देशन जारी गरिएको समिति सदस्य प्रकाश रसाइली स्नेहीले जानकारी दिए ।
उनका अनुसार कांग्रेसले एकभन्दा बढी प्रतिनिधि सभा क्षेत्र भएको जिल्लामा सभापतिले माघ १२ गते ५ बजेसम्म क्षेत्रीय सभापतिलाई क्रियाशील सदस्यको नामावली बुझाइ सक्न निर्देशन दिएको छ । यस्तै एक मात्र प्रतिनिधिसभा भएको जिल्लाका सभापतिले माघ १३ गते ५ बजेभित्र फारम बुझाउनु पर्ने उल्लेख गरिएको छ। यस्तै माघ १४ गते प्रदेशसभा क्षेत्रीय समितिले पालिका समितिलाई र गाउँ नगरले माघ १५ गते वडा तहमा क्रियाशील सदस्यताको नामावली अनिवार्य बुझाउनुपर्ने गरी समितिले परिपत्र गरेको छ ।
माघ ३ गरिएको परिपत्र अनुसार वडाले फागुन १ गते पालिका तहमा शुल्क सहित नामावली बुझाउनुपर्ने उल्लेख गरिएको रसाइलीले बताए । यस्तै, फागुन १०भित्र पालिकाले प्रदेश सभा क्षेत्रीय समितिमा, क्षेत्रीय समितिले फागुन २० भित्र प्रदेश सभा क्षेत्रमा तथा प्रदेश सभाले फागुन मसान्त भित्र क्षेत्रीय कार्यसमितिमा पठाउनुपर्ने उल्लेख छ । एकभन्दा बढी प्रतिनिधि सभा निर्वाचन क्षेत्रीय समितिले चैत १५ र जिल्लाले चैत २९ गते ३ बजेभित्र केन्द्रीय कार्यालयमा शुल्क सहित पठाउन कांग्रेसले परिपत्र गरेको छ ।
