दोहा ।इजरायल र हमास बीचको युद्धविराम आइतवार देखि लागू हुने भएको छ ।
कतारका प्रधानमन्त्री शेख खालिद बिन खलिफा बिन अब्दुलअजीज अल थानीका अनुसार आइतवार देखि युद्धविराम लागू हुने बितिकै गाजामा खाधान्न र स्वास्थ्य सामग्री लगायतका समान बोकेका ट्रकहरू प्रवेश गर्न थाल्नेछन् ।
उनका अनुसार सो क्रममा हमासले ३३ बन्धकहरूलाई रिहा गर्नेछ भने इजरायलले सयौं प्यालेस्टिनी बन्दीहरूलाई रिहा गर्ने जनाइएको छ ।
सो सहमति पछि इजरायली मन्त्रिपरिषद्ले अनुमोदन गर्ने गरी तयारी सुरू भएको इजरायली मिडियाले जनाएका छन् । कतार र अमेरिकाको पहलमा यो युद्धिवराम हुन लागेको हो ।
यो युद्धविराममा अमेरिकी राष्ट्रपति जो वाइडेन प्रशासन र नवनिर्वाचित राष्ट्रपति डोनाल्ड ट्रम्पको सहकार्य भएको जनाइएको छ, यो युद्धविरामलाई विश्व भरबाट स्वागत गरिएको छ ।
संयुक्त राष्ट्र संघले सेवा र उद्धारका लागि ट्रकहरू तयार पारिएको जनाएको छ । युद्धविराम लागू हुने बितिकै थप सहायता ट्रकहरू गाजापट्टीमा प्रवेश गर्न सुरू गर्ने उसले जनाएको छ ।
