काठमाडौ। नुवाकोटको शिवपुरीमा एयर डाइनेस्टीको हेलिकप्टर दुर्घटना हुँदा पाँच जनाको मृत्यु भएको छ । मृत्यु हुनेमा चार पुरुष र एक महिला रहेका छन् ।
नुवाकोटका प्रहरी उपरीक्षक शान्तिराज कोइरालाका अनुसार शिवपुरी गाउँपालिका–७ शिवपुरी जङ्गलको सूर्यचौर क्षेत्रमा हेलिकप्टर दुर्घटना भएको हो । “घटनास्थलमा केही सुरक्षाकर्मी र स्थानीयवासी पुगेका छन् । उनीहरुले हेलिकप्टरमा लागेको आगो निभाइरहेका छन्”, उनले भने ।
हेलिकप्टरमा सवार चार जना चिनियाँ नागरिक र एक नेपाली रहेका थिए । काठमाडौंबाट रसुवा स्याप्रुङबेँसीका लागि उडेको उक्त हेलिकप्टर एयरपोर्टबाट उडेको ३ मिनेटमै सम्पर्कविहीन भएको प्राधिकरणका सूचना अधिकारी ज्ञानेन्द्र भुलले जानकारी दिए । घटनाबारे थप अनुसन्धान आउने क्रम जारी छ ।
घटनास्थलमा प्रहरी पुगेर अनुसन्धान गरिरहेको छ । त्रिभुवन विमानस्थल स्रोतका अनुसार हेलिकप्टर १ बजेर ५४ मिनेटमा काठमाडौंबाट उडेको थियो । दुर्घटना भएको हेलिकप्टर क्याप्टेन अरुण मल्लले उडाएका थिए । सुचना आउनेक्रम जारी रहेकाले यस अघिको समाचारमा मृतकको संख्या चार उल्लेख गरिएको थियो ।
